Өтгөн хаталт нь жирэмсэн үед тохиолддог хамгийн түгээмэл асуудлуудын нэг бөгөөд жирэмсэн эмэгтэйн 50 хувь нь жирэмсний аль нэг үедээ энэ асуудалтай тулгарсан байдаг байна.

Жирэмсэн үе дэх өтгөн хаталтын шалтгаанууд:

1. Жирэмсний даавар-прогестероны нөлөөгөөр хоол боловсруулах замын хөдөлгөөн удааширснаас
2. Төмрийн бэлдмэл болон төмөр агуулсан жирэмсний витамины нөлөөгөөр
3. Жирэмсний хугацаа нэмэгдэх тусам томорсон умай болон ураг бүдүүн шулуун гэдсийг дарж шахсанаас
4. Хэрвээ жирэмслэхээс өмнө өтгөн хатдаг байсан бол жирэмсэлснээс хойш бүр илүү их хатдаг болно.

Ямар арга хэмжээ авах вэ?

ИСЛЭГ ИХТЭЙ ХООЛ, ХҮНС ХЭРЭГЛЭХ: Ислэг ихээр агуулсан хүнсний бүтээгдэхүүнүүд болох бүхэл үрийн гурил будаа, талх, нарийн боов, вандуй, шош болон шинэхэн хүнсний ногоо, жимс жимсгэнэ, заримдаа хатаасан жимс идэх. Ногоон өнгөтэй хүнсний ногоо ахиухан хоол хүнсэндээ хэрэглээрэй

ХАНГАЛТТАЙ ШИНГЭН УУХ: Өдөрт 8 аяга шингэн зүйл уух. Шингэн зүйл өдөр бүр ууснаар гэдэсний дамжуулах үйл ажиллагааг сайжруулахаас гадна өтгөнийг зөөллөдөг. Жимсний шүүс, ялангуяа чавганы шүүсийг эх барих эмэгтэйчүүдийн эмч нар хамгийн түрүүнд зөвлөдөг. Түүнчлэн рашаан, бүлээн усыг нимбэгтэй уухыг зөвлөдөг. Эдгээр нь гүрвэлзэх хөдөлгөөнийг дэмжиж, явах үед гэдэсний агшилтыг хурдасгах үйлчилгээ үзүүлдэг

ТОГТМОЛ ДАСГАЛ ХӨДӨЛГӨӨН ХИЙХ: Жирэмсний хугацаанд тогтмол дасгал хөдөлгөөн хийх нь эрүүл мэндэд тустайгаас гадна гэдэсний гүрвэлзэх хөдөлгөөнийг дэмждэг. Зүгээр л 10 минут алхахад хүртэл тустай байдаг бөгөөд алхаж явах үедээ үзэм, самар, чавга гэх мэт зүйлсийг идээд явахад зугаатай шүү дээ. Хоол идсэний дараа аль болох суултуур дээр сууж өтгөнөө гаргаж байвал аяндаа тархи дадал үүсгэдэг.

ЗАРИМ ЗҮЙЛЭЭС ТАТГАЛЗАХ: Цай, кофе, хийжүүлсэн ундаа зэрэг нь бие дэх шингэнийг хөөж улмаар өтгөн хаталтыг улам нэмэгдүүлдэг тул хэрэглэхгүй байх.

АШИГТАЙ БАКТЕР ХЭРЭГЛЭХ: Пробиотик буюу ашигтай бактер нь дархлаа дэмжихээс гадна хоол боловсруулах үйл явцаар ханган өтгөн хаталтыг эмчилнэ.